ଅସହ୍ୟ ତାତି ; ଗ୍ରୀଷ୍ମ ପ୍ରବାହ ନେଇ ସତର୍କ ସୂଚନା ଜାରି

ଭୁବନେଶ୍ୱର, ୧୦/୬ (ଉତ୍କଳ ସମାଚାର): : ସାରା ରାଜ୍ୟରେ ଅନୁଭବ ହେଉଛି ଅସହ୍ୟ ତାତି ସହ ପ୍ରବଳ ଗୁଳୁଗୁଳି। ରାଜ୍ୟର ଅଧିକାଂଶ ସ୍ଥାନ ସହ ରାଜଧାନୀ ଭୁବନେଶ୍ୱରରେ ସକାଳ ୮ଟାରେ ତାପମାତ୍ରା ୩୨.୨ ଡିଗ୍ରୀ ରେକର୍ଡ କରାଯାଇଛି। ଆଦ୍ରତା ୭୯ ପ୍ରତିଶତ ରହିଥିବାରୁ ଅନୁଭବ ହେଉଛି ଅସହ୍ୟ ଗୁଳୁଗୁଳି। ସେହିପରି ପଶ୍ଚିମ ଓଡିଶାରେ ଅନୁଭବ ହେଉଛି ଅସହ୍ୟ ତାତି। ସାଢେ ୮ଟାରେ ସମ୍ବଲପୁର ତାପାମତ୍ରା ୩୬ ଡିଗ୍ରୀ ରେକର୍ଡ କରାଯାଇଛି। ଝାରସୁଗୁଡା ତାପମାତ୍ରା ୩୫.୪ ଓ ହୀରାକୁଦ ୩୫.୨ ଡିଗ୍ରୀ ରେକର୍ଡ କରାଯାଇଛି। ଉପକୂଳ ଓଡିଶାର କିଛି ଜିଲାରେ ପାଗ ଆଂଶିକ ମେଘାଚ୍ଛନ୍ନ ରହିଥିବା ଦେଖାଦେଇଛି। ଆକାଶ ଆଂଶିକ ମେଘାଚ୍ଛନ୍ନ ଥିବାରୁ ତାପମାତ୍ରା ସାମାନ୍ୟ ହ୍ରାସ ହୋଇଛି। ଆଦ୍ରତା ଅଧିକ ରହୁଥିବାରୁ ଉପକୂଳରେ ଅଧିକ ଗୁଳୁଗୁଳି ଅନୁଭବ ହେଉଛି। ସାଢେ ୮ଟା ସୁଦ୍ଧା ପୁରୀ ଆଦ୍ରତା ୮୬%, କଟକ ୭୬%, ଗୋପାଳପୁର ୭୫%, ବାଲେଶ୍ୱର ଓ ଚାନ୍ଦବାଲି ୬୫%, ପାରାଦ୍ୱୀପ ୬୩%ରହିଛି। ଏହାମଧ୍ୟରେ ଆଗାମୀ ୫ ଦିନ ଯାଏଁ ତାପମାତ୍ରାରେ ପରିବର୍ତ୍ତନ ସମ୍ଭାବନା ନଥିବା ନେଇ ସୂଚନା ମିଳିଛି। ୩ ରୁ ୪ ଦିନ ଗ୍ରୀଷ୍ମ ପ୍ରବାହ ସହ ଉପକୂଳରେ ଗୁଳୁଗୁଳି ଜାରି ରହିବ। କିଛି ସ୍ଥାନରେ ସ୍ୱାଭାବିକ ଠାରୁ ୩ ରୁ ୫ ଡିଗ୍ରୀ ତାପମାତ୍ରା ଅଧିକ ରହିବ। ଆସନ୍ତା ୨୪ ଘଣ୍ଟା ପାଇଁ ୯ ଜିଲାକୁ ଗ୍ରୀଷ୍ମ ପ୍ରବାହ ନେଇ ସତର୍କ ସୂଚନା ଜାରି କରାଯାଇଛି। ଝାରସୁଗୁଡା, ସମ୍ବଲପୁର, ବରଗଡ, ସୋନପୁର, ସୁନ୍ଦରଗଡ, ବଲାଙ୍ଗୀର, ବୌଦ୍ଧ, ମୟୁରଭଞ୍ଜ ଓ କେନ୍ଦୁଝର ପାଇଁ ୱାର୍ଣ୍ଣିଂ ଜାରି କରାଯାଇଛି।