ହରେକୃଷ୍ଣ ମହତାବ ରାଜ୍ୟ ଗ୍ରନ୍ଥାଗାର : ୫-ଟି ସଚିବଙ୍କ ପରିଦର୍ଶନ ଓ ନିର୍ଦ୍ଦେଶ ପରେ ଆରମ୍ଭ ହେଲା ମାର୍ଗଦର୍ଶନ କାର୍ଯ୍ୟକ୍ରମ


ଭୁବନେଶ୍ୱର, // 27/05 //2023 // (ଉତ୍କଳ ସମାଚାର) // ଗତକାଲି ୫-ଟି ସଚିବ ଭି. କାର୍ତିକେୟନ ପାଣ୍ଡିଆନ ହରେକୃଷ୍ଣ ମହତାବ ରାଜ୍ୟ ଗ୍ରନ୍ଥାଗାର ପରିଦର୍ଶନ କରି ପାଠକମାନଙ୍କ ସହିତ ଭାବବିନିମୟ ସମୟରେ ସେମାନେ ସମ୍ମୁଖୀନ ହେଉଥିବା ସମସ୍ୟାକୁ ହୃଦୟଙ୍ଗମ କରି ତାହାର ସମାଧାନ ପାଇଁ ଶନିବାର ଓ ରବିବାର ସକାଳ ୮ ଘଟିକା ଠାରୁ ରାତ୍ର ୯ ଘଟିକା ପର୍ଯ୍ୟନ୍ତ ରାଜ୍ୟ ଗ୍ରନ୍ଥାଗାର ପାଠକ ପାଠିକାଙ୍କ ନିମନ୍ତେ ଖୋଲା ରଖିବା ସହ ସୋମବାର ବନ୍ଦ କରିବାକୁ ନିର୍ଦ୍ଦେର୍ଶ ପ୍ରଦାନ କରିବା ସଙ୍ଗେ ସଙ୍ଗେ ଏହି ପାଠାଗାରକୁ ରୂପାନ୍ତରିତ କରି ବିଶ୍ୱସ୍ତରୀୟ ପାଠାଗାରରେ ପରିଣତ କରିବାକୁ ଘୋଷଣା କରିଥିଲେ । ସେହି ଆଧାରରେ ଆଜିଠାରୁ ଶନିବାର ଓ ରବିବାର ସକାଳ ୮ ଘଟିକାରୁ ରାତ୍ର ୯ ଘଟିକା ପର୍ଯ୍ୟନ୍ତ ଗ୍ରନ୍ଥାଗାର ଖୋଲିବା ପାଇଁ ନିର୍ଦ୍ଦେଶକ ଦିଲୀପ ରାଉତରାଏ ଅବିଳମ୍ବେ ନିର୍ଦ୍ଦେଶ ପ୍ରଦାନ କରିଥିଲେ ଓ ତାହା କାର୍ଯ୍ୟକାରୀ ହୋଇଅଛି । ଆଜି ଶନିବାର ପୂର୍ବାହ୍ନରେ ନିର୍ଦ୍ଦେଶକ ପାଠାଗାରରେ ପହଂଚି ପାଠକପାଠିକାମାନଙ୍କ ସହିତ ବିଭିନ୍ନ ପ୍ରସଙ୍ଗରେ ଆଲୋଚନା କରି ସେମାନେ ବିଭିନ୍ନ ପ୍ରତିଯୋଗିତାମୂଳକ ସେବା ପରୀକ୍ଷାରେ ସମ୍ମୁଖୀନ ହେଉଥିବା ସମସ୍ୟା ସମ୍ପର୍କରେ ଅବଗତ ହୋଇଥିଲେ । ଏହାପରେ ସମ୍ମିଳନୀ କକ୍ଷରେ ନିର୍ଦ୍ଦେଶକ ଶ୍ରୀ ରାଉତରାଏ କେନ୍ଦ୍ର ଲୋକସେବା ଆୟୋଗ ଦ୍ୱାରା ପରିଚାଳିତ ସିଭିଲ୍ ସର୍ଭିସ୍ ପରୀକ୍ଷାର୍ଥୀମାନଙ୍କୁ ମାର୍ଗଦର୍ଶନ ପ୍ରଦାନ କରି ସେମାନେ କିପରି ଅଧିକ ସଂଖ୍ୟାରେ ବିଭିନ୍ନ ପ୍ରତିଯୋଗୀତାମୂଳକ ସେବା ପରୀକ୍ଷାରେ ସଫଳକାମ ହୋଇପାରିବେ ତାହାର ବିଭିନ୍ନ ଦିଗ ଉପରେ ପାଠକମାନଙ୍କୁ ଉପାଦେୟ ପରାମର୍ଶ ପ୍ରଦାନ କରିଥିଲେ । ପିଲାମାନେ ଲିଖିତ ଓ ମୌଖିକ ପରୀକ୍ଷା ଦେବା ସମୟରେ କିପରି ନିଜକୁ ପ୍ରସ୍ତୁତ କରିବେ, ଓ ପରୀକ୍ଷା ଦେବେ, ତାହାର ବିଭିନ୍ନ ଦିଗ ଉପରେ ଆଲୋକପାତ କରିଥିଲେ । ପିଲାମାନେ ମଧ୍ୟ ସମ୍ମୁଖୀନ ହେଉଥିବା ବିଭିନ୍ନ ସମସ୍ୟା ସମ୍ପର୍କରେ ପ୍ରଶ୍ନ ପଚାରି ଉପଦେଶ ଗ୍ରହଣ କରିଥିଲେ । ଆଗାମୀ ଦିନରେ ହରେକୃଷ୍ଣ ମହତାବ ରାଜ୍ୟ ଗ୍ରନ୍ଥାଗାରରେ ପାଠକପାଠିକାମାନଙ୍କୁ ବିଭିନ୍ନ ପ୍ରତିଯୋଗୀତାମୂଳକ ସେବା ପରୀକ୍ଷା ନିମନ୍ତେ ଅଭିଜ୍ଞ ପ୍ରଶାସକ ଓ ବିଦ୍ୱାନମାନଙ୍କ ଦ୍ୱାରା ମାର୍ଗଦର୍ଶନ ପ୍ରଦାନ ସହିତ କୁଇଜ୍ ପ୍ରତିଯୋଗିତା, ପୁସ୍ତକଚର୍ଚ୍ଚା, ପୁସ୍ତକ ପ୍ରଦର୍ଶନୀ ଓ ସାହିତ୍ୟ ଆସର ମାଧ୍ୟମରେ ପାଠକପାଠିକାମାନଙ୍କ ମେଧାଶକ୍ତିର ବିକାଶ ପାଇଁ ନିରନ୍ତର ଉଦ୍ୟମ କରାଯିବ ବୋଲି ନିର୍ଦ୍ଦେଶକ ଶ୍ରୀ ରାଉତରାଏ ପ୍ରକାଶ କରିଛନ୍ତି ।

Leave a Reply

Your email address will not be published. Required fields are marked *